-
1.6K Views 0 Comments 0 Likes 0 Reviews
Zotungccaw Thonaw 1933 kum, Rezua khua tang(4) sia-inn, tang(3) kaccang kulya, khozi phung te heka um tuh Zotung ae hynh pawte aa, khozi phungte pung ka um sakho cih ae cite, khuazi khuadae katua kuh, vyavya kamua lang leih katua vae. Katua kho khy. Sia-inn kakae zemah, laanpi kaccae zemah, ka ai zemah, tyty pou katua vae, ka-ih zama kamahsi khokhy, tua leite sohsoh sangka um kho khy. Nin(1) tu, ka thankhan vaw kahue kulya hin ka luboh kya hin, Zotung ccaw rae Zotung ae Pachia cipaw pung nyh ae sah cite douh oun thung kuh vae. Te tuh vaekheih te luih katho zah, ccalung te ccaccung kalaw kuhzah, ka zei tua vae. ``A te `` Z cia kakung detua. Thuasalama Zotung bya a kyn khopaw kharouh ka mue kho khy. Pachia nynh hawnaw oun pya vae tuh `` A kha thing kapuih sah `` ^i `` ae kaci amin kaphu, i kha lukhung ka khung sah i amin kaphu, o kha lukhung bua ka khung sah o^ amin kaphu. Thuasalamah atu amang kupaw cc acih kupaw hynh, th, ht, t, manglang ze kacitua zah, Chin, Haka, Falam, Tidim blyn nynh, pung amang vae ae paw zah, aroi khah Zotung oi kyn kho vae khy. Sazae kha kakhia?. Vae ae nynh kal kha pawci ae mou? Paw te mou azei ae cite ka khia?, thuat ( #%* a ci ae cite yn zei pya. Te tuh cc aroi kha kamue ka cizah, ka ccue kanmaw zah ka zei tua vae. Ka ccu ccih- ka ccue, cite ka zei tuh phe akyh vae.
Te tuh ..... Ka ...................... = Ka ai
.................KA R H.................. = Ka rih
.................K ka R ............... = Kou karih
Kaccu ccih, Kaccue cite, Zotung bya blyn tu pung ka zei kho vae. Tetu maesalo, Zotung ccaw ka rae kho vae, kacih za, Pachia klang saw kasang vae. Zotung ccaw nae rae sah kho vae na min zungzae lalee sa- Amen ka cizah lungtua naw ka lungkhu hin, tyty beih vae,(1933-34). Tetu St. Mattu baebuu kha kaleih zah, print nae tua pacih cite, R.G Johnson Haka Siabawi kha ka ho pya. Te, London Baebuu society nynh cc hynh th,ts,t,te ru lang ze, hooy khyh tou? cihte, oun ci ae, te- thuakho khyh cite ka leih ae. Tetu cc tuh mi naw ccah zah,1951 kum khe, St. Mattu Theehooy tu print yn tua pya ae. Te, Zotung Chin ccaw tu, laephi vaw lang ccaw kya ze, No-62 naw kya nynh a um cite R.G Jonhson kya te ccaw bua yn pya ae. Te, e Zotung ccaw ka rae lya hyn tang(3) kaccan kulya kum (13) ka ci lya khozi phung te he ka um. piccang tuanaw lungthin mazi ka hooy loukhy. Pachia nynh haw naw yn pya, Zotung ae mah ccaw hoi bua ae sah cite, lasung lang pya paw- ccaw nynh thua- cite latu Zotung ccaw cite kaci naw paw tuh a thua. Moses kha a hoytan amang sah, kae ka luboh te ka bya yn mang sah. Zotung ccaw hyn Pachia lahsung cipaw ccae rarih lang ka ny.
Na haw naw, na ny naw,blyn te Pachia nynh yn la rae sah paw Zotung ccaw, Zotung bya tu, lung tua khae lang, ry lang, te- kamang lang paw ii cite Zotung minphuin nynh lawku- kynku- lang vae, cite ka ho ry.
Khua Ming site kya e.
